صفحة حياتك... بقلم : حسام الدين فكري

 صفحة حياتك...

بقلم : حسام الدين فكري

********************

شيل من دماغك اللي فات

عَدّي المآسي والذكريات

والشوك الجارح والأهات

افتح صفحة جديدة لنفسك

أُلضُم فيها الحروف مع الحروف

وامسح منها الزيف والكدب والخوف

ف السطر الأول اكتب إسمك

ده مش هتعرف تغيّره

طول عمرك لازق فيك

خيط موصول بيدلّ عليك

عنوان على راس مقال

إنت المقال..إنت الحال

إنت المرفوع والمنصوب

والفاعل والمفعول معه

والمعطوف عليه أحياناً

والممنوع من الصرف

في معظم الأحوال !

إنت أول بيت في القصيدة

وآخر كلمة في الحكاية

إنت الريشة ف اللوحة

إنت الحبكة ف الرواية

إنت بإسمك وهيئتك

بلون شعرك وبشرتك

طولك وعرضك وضحكتك

ونظرة عينك ولفتتك

عندك كل السطور فاضية

إملاها بأحلامك وآمالك

إكتب على راحتك خالص

واشرح كل اللي ف بالك

صفحة حياتك الجديدة

هتكونلك دُستور أيّامك

خليّك بقى من فضلك

ماشي ع السطر مظبوط

وخلّيها على طول قُدّامك !